【渡輪】西九文化區管理局啟用全新西九碼頭及「西九渡輪」──8分鐘過海旅程體驗維港景致

西九文化區管理局（「管理局」）喺2025年11月14號為位於M+對開海濱嘅全新西九碼頭揭幕，並且正式啟動「西九渡輪」服務。

西九←→中環嘅「西九渡輪」服務由承辦紅磡←→中環航線嘅珠江船務企業（集團）有限公司旗下富裕小輪有限公司運作，經過2025年11月10~13號試行營運4日後，2025年11月15號正式投入服務。

闊別紅磡九寒暑 中環渡輪復再來

除咗加強海上交通連接外，管理局更加喺西九碼頭沿岸加設特色餐飲設施，致力令碼頭成為1個充滿活力嘅全新海濱地帶，加強訪客文化消閒體驗。

啟動禮主禮嘉賓包括：

• 香港特別行政區政府運輸及物流局局長陳美寶
• 西九文化區管理局董事局主席陳智思
• 珠江船務企業（集團）有限公司董事局主席劉廣輝
• 西九文化區管理局行政總裁馮程淑儀
• 香港特別行政區政府文化體育及旅遊局工程策劃總監陳特揚
• 香港特別行政區政府運輸署署理副署長／公共運輸事務及管理黃志光
• 土木工程拓展署南拓展及可持續大嶼辦事處處長胡國源
• 香港知專設計學院副院長何世孝博士
• 西九文化區管理局首席機構發展總監何珏珊。

西九文化區管理局董事局主席陳智思表示：「啟動全新嘅西九碼頭以及『西九渡輪』服務係管理局持續努力將西九打造成世界級文化旅遊目的地嘅重要里程碑，不僅為市民大眾提供便利快捷嘅過海旅程，亦為全球訪客帶嚟難忘嘅參觀體驗，方便佢哋參與西九多元豐富嘅文化活動。透過喺西九海濱引入精選餐飲、文化節目以及休閒活動，我哋積極營造一個充滿活力嘅都市空間，加強社區聯繫、激發創意，進一步推動西九成為香港重要文化旅遊地標。」

香港特別行政區政府運輸及物流局局長陳美寶表示：「喺運輸署同埋西九管理局嘅促成下，西九文化區以及富裕小輪聯手打造『中環－西九龍』水上的士新航線（『西九渡輪』），為旅客同埋市民來往西九文化區呢個地標，提供方便快捷嘅海上交通選擇。西九文化區係香港嘅重要地標，亦可以算係自成一角，新航線嘅開通除咗促進中環以及西九龍兩岸嘅旅遊熱點發揮協同效應外，亦能為唔同需要嘅乘客帶來無限可能。」

珠江船務企業（集團）有限公司董事局主席劉廣輝表示：「作為香港海上運輸業嘅長期營運商，我哋好榮幸能夠同西九文化區管理局合作營運『西九渡輪』服務。我哋一直致力於提供安全、可靠且方便嘅渡輪體驗。呢條連接西九以及中環嘅新航線，以及已改道停靠喺西九碼頭嘅現有水上的士服務，體現咗我哋嘅專業承諾。我哋深信西九碼頭以及寵物友善嘅『西九渡輪』服務將大大改善日常連接，並且透過提高通達性，支持西九作為休閒目的地嘅蓬勃發展。」

「西九渡輪」由西九管理局連同富裕小輪合作營運，用船係「富裕」號（A143023），型號「JL3280」，由中國廣東省珠海市嘅江龍船艇喺2017年生產，2018年9月正式落水。「富裕」號總長33.8米，闊8.6米，排水量170.3噸，船體由鋼製造，上蓋玻璃纖維，可載乘客199人（另計唔多於9名船員）。動力系統配備2副746kW嘅主機以及2副60kW嘅副機，航速15節，續航力大約8個鐘頭，最大可抵受8級風同4米海浪。

船身「拉花」設計靈感源自海浪，由香港知專設計學院學生參與創作，展現西九以及維港動感活力。

「西九渡輪」服務連接西九碼頭同埋中環9號碼頭，船程大約8分鐘，大約每30分鐘一班，服務時間為星期一至五8時至22時，星期六、日及公眾假期服務延長到23時（最後一班由西九開出）。船隻設有冷氣船艙，為乘客帶嚟舒適愉快船程，但容許乘客攜同單車以及寵物共乘。

渡輪單程成人票價為港幣20蚊，攜同嘅寵物另外收費，票價同樣係港幣20蚊。合資格乘客可享優惠票價港幣10蚊，包括3~11歲兒童、65歲或以上長者及殘疾人士。月票售價為港幣560蚊，持票人可以喺指定月份無限次乘搭「西九渡輪」，為乘客提供靈活、實惠嘅過海選擇，乘客可以由前一個月嘅25號開始喺西九碼頭同埋中環8號碼頭購買月票。

除咗「西九渡輪」服務外，現有水上的士「尖東——中環」航線，亦會改道加入喺西九碼頭上落客，由西九前往尖東只需10分鐘，為訪港旅客提供更多交通選擇。詳情可參閱水上的士營辦商網頁。

除咗加強西九對外交通連繫，管理局喺西九碼頭沿岸加設5間全新餐飲設施，為訪客提供更多元化嘅輕食以及飲品選擇；包括懷舊艇仔粉、港式街頭小食、素食創意料理、日式屋台風味、西式經典美食，為消閒體驗增添豐富味覺享受。西九碼頭亦同藝術公園海濱長廊相連接，屬於香港消閒熱點，2025年11、12月內，乘客只需要喺「西九渡輪」上掃描二維碼，並且喺西九碼頭嗰5間餐飲設施消費嗰陣出示相關憑證，即可獲享優惠（優惠受條款及細則約束）。

西九碼頭係由西九管理局管理嘅「公眾碼頭」。由2025年12月1號起，西九碼頭亦會開放畀私人船隻預約使用，畀船隻泊岸上落客（可供預約時段為每日0730時至23時）。申請人須先到西九網頁嘅網上預約系統登記船隻，預約使用碼頭嘅日期同埋時段。呢項服務費用全免，有助旅遊業界更靈活安排行程，參觀西九區內博物館、表演場地以及享用特色餐飲設施，推出更多元化旅遊產品與體驗。網上預約系統現已接受預約。

有關西九碼頭更多詳情、「西九渡輪」服務班次、票價詳情及其他資訊，請參閱西九文化區相關網頁。