【渡輪】「Jetfoil噴射船」牌照到期…經典未續？

1975年4月25號，「噴射飛航」前身——信德船務旗下嘅遠東水翼船公司——首次採用由美國波音公司出産嘅929型「Jetfoil噴射船」「木星」號載客由香港前往澳門，憑當年革命性嘅船體離水航行設計帶來前所未有嘅穩定航行、航線中首度採用噴射引擎刷新速度紀錄，以及相對之前款式水翼船倍增嘅載客量，為「香港←→澳門」航線揭開全新一頁，開啓同款船隻連接港澳兩地至今半世紀嘅歷程。

隨着2024年9月20號，噴射飛航喺疫情告一段落後首次重新使用「Jetfoil噴射船」「錫星」號載客，早前巴士台得到Jetfoil噴射船保育關注組協助下曾經簡單介紹過「Jetfoil噴射船」服務香港——澳門航線已達半世紀。

不過自從「Jetfoil噴射船」「錫星」號恢復載客，已屆1年之時，消息指「Jetfoil噴射船」「錫星」號嘅相關牌照喺2025年11月18號到期，而一直未有確實消息會否完成年檢。「Jetfoil噴射船」「錫星」號喺2025年11月18號行走3個來回班次：

香港 → 澳門	澳門 → 香港
0830	1000
1130	1300
1500	1630

因為「Jetfoil噴射船」「錫星」號係當時唯一仍然服務「香港←→澳門」航線嘅「波音929」型「Jetfoil噴射船」，萬一「錫星」號真係「退役」就代表1個經典嘅終結，所以呢個消息令一班交通迷蜂擁去為「錫星」號「留倩影」。

其後Jetfoil噴射船保育關注組一度引述「碼頭職員」消息，指「Jetfoil噴射船」「錫星」號執行2025年11月18號1630時「澳門 → 香港」航班後就會「榮休」。不過到黃昏時分又指「Jetfoil噴射船」「錫星」號係咪退役仍然未有百分百定案。

當2025年11月19號朝早向「噴射飛航」查詢後得知：

• 「錫星」號確實處於「停牌」情況
• 「噴射飛航」已經暫停使用「錫星」號提供服務
• 「噴射飛航」對於「錫星」號他日重新投入服務定係退役「至今未作最終決定」
• 「祥星」號正在維修（挪威Kvaerner Fjellstrand生産、雙體船身並附四組全浸式水翼嘅「FoilCat」型噴射船，全球只得2架，同款嘅「日星」號自2024年初已經「不在役」）
• 現階段「噴射飛航」只能夠提供「雙體船」服務

當然眾所周知嘅係當港珠澳大橋通車之後，運作成本高昂嘅跨境高速渡輪喺票價上「肯定唔及穿梭巴士」，而香港、澳門都充斥「窮遊」嘅中国遊客就令情況雪上加霜，曾經令香港、澳門傲視全球嘅「Jetfoil噴射船」跨境高速渡輪究竟會唔會黯然落幕？相信可能淨係得一班交通迷先至着緊…