(22:15 更新，加入更多相片)
電動巴士除咗專利嘅單雙層之外，旅遊巴市場仍有待發展。觀乎過去引入香港嘅電動旅遊巴都係車長12m 的龐然大物，7-9m 中型巴士嘅市場板塊一片空白，有商用車銷售業者似乎見到呢個市場空間，引入中国新能源車廠嘅相關產品，今日舉行發佈會，接待巴士業界及傳媒參觀。
呢部來自南京恒天領銳汽車有限公司嘅 EB30 電動中型巴士，外型可謂同 Toyota Coaster B70/B80 仕様幾乎 copy & paste。不過，長度達8m、闊度為2.2m，所以望埋去都唔難辨別出嚟。甚至乎睇車尾同右邊車身，見到太平門嘅位置，應該都幾肯定唔會認錯車款。
至於高度，代理派發嘅資料載述為 2.94m，但驟眼望埋去，似乎未計算頂置冷氣機組嘅厚度，估計起碼 300mm，即真正嘅總高起碼 3.2-3.3m。
代理响儀式上好強調闊度比「日本牌子小巴闊」因而可以採用400mm 闊度而非本港常見嘅380mm 闊度嘅座椅，作 2+2 編排佈置，而且走廊淨闊(離地計400mm) 亦達到340mm，比法例要求的300mm 為多，所以乘坐感覺必定比日本出品更佳。
載客量為30座位，在車頭左側設有兩個「倒頭位」，比常見嘅「日本牌子小巴」載多 3名乘客。
電機系統採用恆久磁摩打，額定功率輸出140kW；電池為寧德時代嘅磷酸鋰鐵，容量175kw/h。代理聲稱响香港進行過實地測試嘅續航距離為 280km，官方小冊子 320km乃吉車於本港測試嘅續航距離，不過生產商網站載有可認為係同一款車嘅資料，顯示續航距離僅250km。也許輸港版本做咗啲改良吧?!
迫力系統為中重型車常見嘅全風式，亦可能因此而能夠採用「氣擔」─ 氣墊式懸掛。代理表示車價 $1,680,000，雖然比日本牌子小巴貴逾倍，但連同架設充電樁加諸日常使用成本，十年可以「倒賺」逾 $1,800,000。即係點請自行判斷，我哋只係純粹介紹。
有興趣想了解更多，可聯絡代理「中能電車有限公司」查詢，銷售熱線 9328-0203。
備註：所有規格資料僅供參考，一切以廠方及代理公佈為準。
Be the first to comment