九巴「偷唔夠位」轉彎 左邊車身被掃爛

2022年7月29號夜晚10點半左右，一架行走緊268X號路線去洪水橋方向嘅九巴富豪B8L型雙層巴士（車隊編號：V6X23，車輛登記：XA3334），喺彌敦道北行轉入亞皆老街西行嘅時候發生意外。

根據巴士上面乘客所講，當時巴士行經呢個彎位嘅時候發出怪聲，巴士車長決定停車嘅檢查，最後發現巴士左邊中擔同埋尾擔嘅旁板被掃甩晒出嚟。

巴士乘客同埋路過嘅途人都對呢個情景嘖嘖稱奇，紛紛拎起智能電話影低呢個情景。據悉事件中除咗架巴士爛咗之外就無人受傷。

不過事發地點講返上嚟就曾經發生過有企喺欄桿外面等過馬路嘅途人被轉彎嘅巴士夾到扭斷隻腳，所以無論你係途人定司機，喺街上面真係要小心留意路面情況。