之前講到，賽馬會「藝術有SENse」計劃（英文：Jockey Club Arts Make SENse Programme；下簡稱「藝術有SENse」）係由香港小童群益會主辦、香港賽馬會慈善信託基金捐助，以視覺藝術作為媒介啟發有特殊教育需要（SEN）學童嘅服務計劃。「藝術有SENse」旨在運用視覺藝術元素同埋感官關聯（sensory association），通過藝術創作歷程，為有SEN狀態嘅學童提供情緒出口，提升佢哋嘅社交溝通技巧，畀佢哋體驗由創作而嚟嘅滿足感。
「藝術有SENse」喺2021年5月期間搵嚟早已退役嘅前中巴利蘭珍寶SF15舉行「Common SENse：藝術介入SEN的巴士展覽」（簡稱「Common SENse」），去到近年俗稱「熱狗」嘅退役雙層巴士裡面，展出特邀藝術家因應關注SEN發展嘅藝術創作，並且加設現場藝術工作坊（例如：迷宮設計、電線網淺浮雕、學習Matisse繪畫等）畀參觀者即時體驗。
其中1位參展藝術家林兆榮專門研究城市、交通歷史、香港電影、藝術設計、粵語粗口等，佢話自己係讀藝術、搞文化研究、會行長途路、砌Lego、鍾意城市、寫故事…嘅「沙田巴膠」。
既然佢本身都係巴士迷，喺展覽中創作咗以《18X！巴士極速十八區》為題、一日搭巴士跨越18區嘅「遊巴士河」活動，邀請巴士迷參加，由路線網絡嘅縝密交錯，以遊戲突出唔同人對巴士路線嘅認知同埋想像，展現縝密而交錯嘅路線網絡何以吸引某一啲人。
主辦單位亦為此喺2021年5月13號搞咗1場「追踪SEN巴士遊」，由下晝大約15時開始，行走以下路線：
粉嶺港鐵站A3出口→吐露港公路→獅子山隧道→窩打老道→彌敦道→尖沙咀碼頭→梳士巴利道→海底隧道→香港仔隧道→黃竹坑巴士廠→華富邨→山道天橋→郵政總局→海底隧道→九龍城→大老山隧道→吐露港公路
由於呢架前中巴利蘭珍寶SF15都叫做「有返咁上下年紀」，由一開始喺粉嶺港鐵站已經吸引到途人以至揸緊車嘅司機「猛咁昅」。
一路向南行，珍寶巴士去到尖沙咀碼頭稍事整頓，期間有巴士車長仲一埋總站就掉低架巴士過去研究珍寶巴士個司機位同依家開工揸緊嗰架有乜分別――結果佢哋不約而同咁講：「天熱你都係唔好叫我揸『熱狗』喇！」
現場一眾途人不時查詢今次「Common SENse」嘅活動詳情――而無論係後生嘅「出於好奇」，定係無咁後生嘅「啲回憶返晒嚟」，大家都爭相「打卡」。
去到港島，珍寶巴士首先去到香葉道黃竹坑巴士廠外，同一眾守候多時嘅巴士迷見面――藍色紙皮石、交錯嘅線條構成形狀，變成一個個「色塊」，大家都可以連結並且投入自己嘅想像世界。
當珍寶巴士去到華富邨，身處差唔多時期設計嘅屋宇之間，珍寶巴士就好似去咗「老朋友」屋企咁――而時代嘅變遷又可以由現役服務緊一班街坊嘅冷氣巴士對照出嚟。
因為「Common SENse」主辦單位預先公佈珍寶巴士會到訪華富邨，現場由路邊到走廊都有街坊扶老攜幼「參拜」，「藝術有SENse」嘅同工亦藉機派發單張宣傳活動。
香港嘅專營公共巴士有所謂「18年大限」，而華富邨重建計劃亦已經排上日程――當社會不斷向前，舊事物慢慢被人丟淡，其實就好似社會不停追求「集體」、「歸一」，公眾難免忽略咗有特殊教育需要（SEN）嘅學童，大家喺覺得珍寶巴士好得意嘅時候，唔好忘記今次活動背後想帶出嘅訊息。
珍寶巴士之後再去返港島北岸繼續行程，喺近年香港嘅新景觀前面，珍寶巴士嘅外形仍然「好香港」。
落到中環、灣仔，返到去珍寶巴士昔日服務公眾嘅地方，又勾起大家幾多對往日香港嘅印象？
黃昏時份，珍寶巴士去到九龍城，天色漸沉之際，今次「追踪SEN巴士遊」亦去到尾聲…但用藝術協助SEN學童之路仍然繼續向前。
至於講返架「藝術巴士」，嚟緊嘅2個週末會去到其他地方畀公眾參觀：
東華三院馬草壟營地
地址：上水馬草壟路33號
日期：2021年5月15~16號
時間：1200~1800
石屋家園
地址：九龍城聯合道 133 號
日期：2021年5月22~23號
時間：1200~2000
有興趣參觀就記低喇！
2 Trackbacks / Pingbacks