【香港電車】植根香港 同心同行 贊助乘客 免費搭車

之前講過，2021年3月6號，中信銀行（國際）因為要宣傳佢哋旗下一項叫「inMotion動感銀行」嘅服務，決定贊助全香港市民免費乘搭天星小輪來往尖沙咀←→中環／灣仔。

【天星小輪】銀行贊助 搭船免費

其實兩日後，2021年3月8號，香港中國企業協會為咗慶祝自己30歲生日，決定贊助全香港市民免費乘搭香港電車。

一如以往其他機構贊助市民免費乘搭香港電車，車廂入面嘅錢箱同埋八達通機都「笠咗頭套」，有唔少乘客都感到愕然，甚至想揭起佢照掟錢入錢箱，唔接受呢個「恩惠」。

不過，返去上次講嗰幾句…

有時候有人會問：作為一間商業機構，贊助市民免費乘搭天星小輪或者香港電車，有幾多乘客睇得到？成效有幾大？

或許重點唔係在於單純嘅一個宣傳作用，而係作為一間希望喺香港做生意嘅公司，掟嚿錢去支持香港嘅老牌形象公共交通機構，都算係一種社會責任。