英國早前一項關於倫敦巴士司機疲勞駕駛情況嘅調查，近日向倫敦有份參與嘅巴士公司公布,情況令到業界關注。
呢項據講係全球首次進行嘅調查，係去年中由倫敦運輸局委托英國羅浮堡大學進行。喺 1353份收返嘅問卷當中, 有一成七受訪人士表示過去十二個月內，曾經有多過一次喺駕駛工作途中瞌眼訓。有兩成受訪者話每星期有兩至三次要頂住眼訓嚟開工，有三成半以上更表示過去一年入面因為疲勞幾乎出事。
為此，擁有兩萬名巴士司機會員嘅英國工會Unite, 表示若倫敦運輸局再唔想辦法解決呢個問題，佢哋會舉行投票，決定係咪喺今年較後時間發起工業行動。 Unite嘅地區發言人表示, 倫敦有好多巴士司機因為長期帶倦駕駛而患上慢性疲勞所引起嘅病徵，情況已經不能容忍。 除咗對其他路面使用人士造成威脅，對司機身心亦構成影響。佢呼籲當局儘快作出決策，使司機同業能夠有足夠休息時間及準時落班。
倫敦運輸局巴士車務總監回覆話，局方對安全問題一直高度重視，亦已向外公開由羅浮堡大學進行嘅報告結果，及所建議嘅措施。但針對巴士司機疲勞駕駛問題並無一針見血既方法。佢因此呼籲Unite方面繼續同佢哋商討對策，減少巴士喺路面造成嘅意外。
其實呢個問題一直都存在，筆者十幾年前都曾經試過多次開工時瞌着咗。最深記憶係巴士載緊客向左轉彎落斜，去到一條窄橋既樽頸位過咗雙白，對面有部私家車駛埋嚟先醒返，前後已經係多過三秒鐘。 當時仲係下晝四點半日落時份。此外,疲勞駕駛亦令到判斷力大大降低及脾氣轉壞,少少嘢都可以攪到響長咹及對人爆粗。
不過, 近年巴士營運商因為人手唔夠, 要求司機做多幾個鐘時有出現。另外，有啲公司或車廠入面好多字軌表面上開工時數睇落好似無變甚至短咗，但中斷休息時間其實係縮短咗，變相開車時間多咗。此外，倫敦運輸局及某些地區政府行政失誤引致局部地區交通擠塞,就令到巴士司機要硬食. 近期例子就有Hammersmith Bridge因結構問題無限期關閉作緊急維修，令所有車擠到另一條橋嗰區。傳媒揭發下原來係倫敦運輸局同Hammersmith & Fulham地區政府拆唔掂維修項目條數, 一直拖拖到條橋有事先爆煲。另外大部份地區唔積極打擊繁時違泊情況，亦係其中一個阻住司機收工原因。至於司機驚駛環境方面又限制多多，多個地區近月唔知邊度學埋香港班運輸官員啲嘢, 已經將道路速限由時速30英哩改為二十英哩，但公司無加時間。有啲公司又喺車上安裝眼睛監測器，捉瞌眼訓，變相加重司機壓力。
一句到尾, 工會攞調查結果攞票，倫敦運輸局揸流灘，巴士司機永遠都係錯。
相關新聞鏈結: https://www.bbc.co.uk/news/uk-england-london-51005755
Be the first to comment