近年互聯網興起「虛擬YouTuber」（日常簡稱「VTuber」）文化，主要係一種以YouTube為平臺作直播影片（生放送）以及投稿嘅二次元創作者。「VTuber」最早發源自日本，呢個名詞由2016年12月開始活動嘅「絆愛（キズナアイ／Kizuna AI）」首次使用，定義爲「由電腦圖形所繪製插畫風格嘅人物YouTuber」。

日本科技公司COVER株式會社喺2017年加入「VTuber」市場，旗下開設「hololive」作為經紀公司，以經營「VTuber」為其主要業務。

其中「hololive」四期生之一嘅「桐生可可（桐生ココ／きりゅうここ／Kiryu Coco）」，自2019年12月出道，一直頗受歡迎。

2020年9月25號朝早6點，「桐生可可」喺直播節目《早安可可》中分享咗自己頻道嘅觀眾分佈，展示出YouTube後台數據截圖，再讀出觀眾比例。由於截圖上出現「上位の国」字眼並且列出日本、美國、臺灣、菲律賓、印度尼西亞觀眾嘅比例。中国大陸網民因此「出征」，喺「桐生可可」嘅推特下大量使用殘體中文對佢發表人身攻擊、侮辱性言論。

因應呢件事喺中国「炎上」，「桐生可可」轉播用嘅bilibili直播間隨即停播，並被封禁一個月，之後改為永久封禁。COVER株式會社喺9月27號經bilibili發表中文聲明向中国大陸觀眾致歉，表示尊重中國主權及領土完整，尊重《中日聯合聲明》及《中日和平友好條約》，堅決擁護一個中國政策…

10月18號，COVER株式會社再發出公告，表示「非出於故意」，並且「喺呢次爭議過程中受到極其嚴重嘅誹謗中傷以及殺害預告」。10月19日，「桐生可可」恢復活動後，部分中国大陸網民對「桐生可可」YouTube直播間聊天室干擾以及推特攻擊持續，逼使11月12號同16號，COVER株式會社發表2則公告，指「hololive」中國所有成員都將於2020年底前「畢業」。

呢次事件引起日本、臺灣以至歐美觀眾關注，普遍對中国大陸網民行為感到不滿，認為COVER株式會社處理手法錯誤，懲罰過重，並且認為COVER株式會社向中国屈服。歐美觀眾更加認為，塞網絡暴力同中国大陸「政治正確」落一個非中国大陸嘅「VTuber」上面，逼佢必須遵守中国大陸審查制度係無理。

不過，無咗中国網民「支持」無阻「桐生可可」發展，事發後「桐生可可」喺YouTube上嘅支持者數量激增超過6成――根據資料，去到2021年6月28號，「桐生可可」YouTube頻道訂閱人數突破130萬人。