繼 (唔知仲有無行緊) Optare Solo M790 同被運輸署拖延逾兩年先至出到牌嘅 Mercedes Benz Sprinter (EVM body) 之後，再有意大利x英國嘅 Fiat Ducato (Mellor Orion body) 低地台小巴進軍香港市場，樣版車日前運抵香港，今日在尖沙咀街道出現，據了解為予小巴業界初步參觀收集意見。
外觀上與前年在大埔科學園展出，同樣由英國 Mellor Coachcraft 組裝車身嘅平治 Sprinter 有相當明顯嘅分別，除咗因為選用意大利快意 (Fiat) Ducato 為基礎車型 (Base vehicle) 而車頭外觀當然有所不同之外，車身闊度亦明顯較窄，長度亦較短，兩側「沙板」亦不再是平板一塊，有返一啲「線條」。
向在場嘅代理商了解，因時間關係暫未有Catalog 提供，但整體規格與英國「原廠」大致相同。對照返 Mellor Coachcraft 網站資料，車身尺寸為 7470x2200x2600mm/h (未計頂置 Denso 冷氣，高度增加約250mm)；軸距4890mm，睇數字有少少「驚嚇」，因為比豐田Coaster / 三菱 Rosa 長咗接近1m，即使是 平治 Sprinter 對比也多出逾400mm，擔心會有「唔夠軚」(迴旋半徑過大) 問題，但廠方資料 Turning Circle 約17m，數據上比豐田或三菱相差不遠。當然，實際上就要睇吓有無機會試駕過之後先至知，因為「夠唔夠軚」除咗睇數據，仲要睇埋軚箱結構同操控。
基礎車型嘅 Fiat Ducato，配備引擎排氣量 2300cc，最大馬力 180ps。夠唔夠「推」亦當然要試過車先至知，但如果以我哋測試過嘅 平治 Sprinter (節目剪輯進行中，快將响 YouTube 上架) 嘅引擎排氣量僅 2146cc，馬力 163ps 去估計，應該唔會太差。但呢架 Fiat Ducato 機械方面最特別之處係前輪帶動，「頭轆車」是也 !!! 翻查資料確係香港小巴市場史無前例嘅機械佈局。
可能好多人仍然都係會掛在口邊「唔好揸、好易壞、無零件、好難整……………………….」試圖繼續維持慣性收視；又的確意大利車响香港嘅表現彷彿「仲爭啲啲咁」，但架車剛剛到港，揸都未揸、車底未捐，咁快又嚟嗰啲台詞，係咪魯莽咗啲呢?!
外型嘅嘢就各有所好，機械嘅嘢有待時間引證，但至少睇數據睇資料，就咁望過吓部車，值得期待嘅。不過….. 唔知 (疑似)收受皇X車行利益嗰班運輸署驗車官又想玩乜嘢把戲而拖延驗車幾耐了，所以大家都係等吓先啦。
1 Trackback / Pingback