興建多年嘅中九龍繞道會喺2025年12月21號正式開始分階段通車，香港兩大專營公共巴士公司都分別公佈咗會因應新路而調整巴士路線。
而持有城巴旅遊有限公司（旅行社牌照號碼：350632）嘅城巴有限公司（城巴）就順手趁呢個機會搞咗個《穿越中九龍 – 中九龍繞道開篷巴士團》。呢個團號稱可以乘搭觀光城巴嘅開篷巴士、做首批親歷香港基建新篇章嘅市民，見證歷史性通車日。
中九龍繞道正式通車代表嘅唔只係一條道路，更加改變城市發展、以更短嘅行車時間連接九龍東及九龍西，開啟九龍交通新時代。
城巴呢個開篷巴士團當然係限定通車首日只搞一程，帶領乘客一同喺中九龍繞道通車首日登上開篷巴士，以360度全景視角，親身見證香港城市發展嘅重要里程碑。
開篷巴士團除咗帶領參加者探索新通車嘅中九龍繞道之外，仲會途經將藍隧道以及跨灣大橋深入將軍澳，期間仲有聲音導航介紹沿途各基建以及交通發展，絕對適合鍾意睇交通建設嘅朋友！
- 日期：2025年12月21號
- 時間：0930、0940、1130
- 集合以及解散地點：旺角（染布房街近麥花臣遊樂場）
- 行程（中途不停站）：旺角→中九龍繞道→將軍澳隧道→將軍澳跨灣大橋→將藍公路→中九龍繞道→旺角
- 參加者會收到一張紀念證書
- 票價：港幣138蚊
- 每名成人乘客可攜帶1名3歲或以下而唔佔用座位嘅小童
- 凡4歲或以上嘅小童都需要購票，大小同價並可以佔用座位
- 有興趣嘅參加者可以點擊呢個網址購票
Be the first to comment