過境巴士肯定不再容許3+2座椅佈局

日前撰文提及中国廣東省交通運輸廳响上個月發佈新的《廣東省直通港澳道路運輸管理辦法實施細則》，指明過境巴士的座位數目上限為57座，且採用的座椅闊度及座墊深度最少達400mm。另循技術角度分析，若巴士車身闊度達至2550mm 的話，車廂淨闊仍足夠排佈 3+2。只不過有網友搵到涉及的「国标」條文原來闡明只可以 2+2，咁就真係大家都唔駛再諗咁多。

網友 Tony Xue 响 Facebook「旅遊巴士交流暨貼圖區」群組內一個討論「3+2」嘅 Post 留言：

首先，我都要承認「睇漏眼」，但同時多謝呢位 Tony Xue 大哥「提燈引路」，搵到 GB7258-2017 內有關嘅條文，確實闡明「專用校車的學生座椅在車輛橫向上最多採用“2+3”佈置；其他客車座椅在車輛橫向上不應採用“2+3”佈置（最後一排座椅除外）」

即係話若根據中国廣東省交通運輸廳嘅公告，100% 絕對肯定 3+2 座椅佈局消失於過境巴士了。

或許大家會根據條文，提出以「過境學童服務」就可以「3+2」了。道理上是的，但若根據返份公告要援引的 GB7258 標準闡明的要求的話，要接載學生就必須採用如下圖的「中国特色」的校巴。

撇除香港運輸署驗車組會否批准使用的考慮，相信唔會有過境巴士公司採用。況且，除咗車款仲要聘請兩名甚至三名保姆。而且部車唔可以响星期六、日及學校假期接其他類型嘅柯打。更可以肯定「過境學童服務」嘅諗法來得有點不切實際。