九巴安秀苑新路線 推出特別車費優惠？！

之前講到，九龍巴士（一九三三）有限公司（「九巴」）為迎接安愉道首個居屋項目——安秀苑——入伙，推出2條全新「安達臣專線」——19號巴士路線以及600號巴士路線分別喺2025年3月30號以及31號投入服務，進一步提升九巴東九龍巴士網絡。

九巴全新「安達臣專線」新路線2025年3月底啟航

九巴為咗吸引更多乘客乘搭以上2條新開設嘅巴士路線，會特別為19號巴士路線以及600號巴士路線提供特別嘅優惠畀乘客。

根據流傳嘅乘客通告，九巴會喺星期日以及公眾假期向乘搭19號路線嘅乘客提供以下嘅車費優惠：

• 每一個畀咗成人車費嘅乘客，可以帶同一個符合資格畀半價車費嘅12歲以下小童免費搭車
• 凡係陪同65歲或以上長者搭車嘅乘客，可以用現金以半價繳付車費
• 凡係陪同合資格殘疾人士搭車嘅乘客，可以用現金以半價繳付車費
• 合資格嘅殘疾人士，利用八達通繳付車費，可以免費搭車

另一張流傳嘅乘客通告就指出，九巴會向喺指定日期範圍之內，利用同一成人或學生身份八達通卡繳付全程車費、乘搭咗10程19號路線或600號路線嘅乘客提供1程免費車票。

相關優惠相信都會吸引當區市民選擇乘搭九巴19號巴士路線以及600號巴士路線，然而有唔少巴士車長對呢個安排表示憂慮：

表面上提供畀19號巴士路線乘客嘅特別乘車優惠條件，雖然已經準確咁列出喺乘客通告上面，但相信到實際運作上會有一啲「慣咗手勢」嘅市民，因為習慣使用八達通卡拍卡，而未能享用今次特別需要改用現金嘅乘車優惠，由此引起一啲不必要嘅乘客爭執。

至於提供「搭10程送1程」嘅免費車票換領安排，由於需要乘客特別去到尖沙咀碼頭巴士總站嘅九巴客務站換領，有九巴嘅站務人員就擔心可能會有部分乘客唔了解呢種「跨區」換領方式，既為乘客帶嚟不便，亦加重咗前線人員要特別向乘客解釋嘅工作量。