整裝準備 捲土重來 宇通 ZK6127HQ Marcopolo Audace 800 車身 旅遊巴士

俗稱「国产车」來自中国嘅巴士，除咗本台的「偉大的香港巴士吳三桂」Jacky Lim 引入嘅廈門金龍之外，必定輪到第二個進軍香港市場嘅牌子，來自中国鄭州嘅宇通客車。

宇通進入香港之後，適逢其會各種市場客觀環境因素，加上當時的代理商負責人在行業內的資歷與人脈關係，業績迅速大爆發，不單超越廈門金龍，更榮登全港銷量榜首。

未知是否「大爆發」得廠方和代理都應接不暇，質素可靠性與市場要求可謂完全脫節，還有操控表現惹來司機們滿肚牢騷群起攻之；車身即使做足清潔保養，僅幾年光景已經銹漬處處甚至潰爛不堪。隨著銷量持續下滑，宇通決定與代理分道揚鑣。

宇通廠方靜候數年，委託本港汽車代理翹楚大昌行集團成為新代理商。惜因武肺疫情，待至近期，大昌行旗下嘅合壹汽車有限公司，終於在廠方夥拍常州 Marcopolo 作車身建造商之下，帶來全新嘅 ZK6127HQ 旅遊巴士。

Marcopolo 早已為多個歐洲底盤牌子裝配車身供應香港，其質素可謂已得到肯定，並可見熟悉香港市場「奄尖夾腥悶」的需要，宇通此舉也許能評之「算有自知之明」，知道重建市場信心的方向。

另一邊廂，宇通於歐洲，尤其是英國市場，在當地代理的引導及推動之下，名為 GT12 的型號近年取得豐碩業績，買家不止是中小型旅遊車公司，更有大型客運企業。可是，GT12 除了規格該難達運輸署的「374A之5的搞局」，要滿足香港市場要求或「挽回市場信心」恐怕難度甚高，既然 Marcopolo 有此往績，宇通及合壹作此安排既肯定可免重蹈覆徹，或至少省去車身部份衍生的工作，可集中資源處理底盤機械之事，未嘗係一個可取嘅方向。

宇通昔日為香港市場配備「例牌菜」的康明斯引擎，今次捲土重來的新產品，則用上 Lim 叔叔評價認為表現比康明斯更好的玉柴引擎；以往被大量司機狠批「揸完要睇跌打」嘅棍波波箱，當然隨著市場走向而消失，換上了 ZF 六前速自動波。

昔日令一眾司機們怒火中燒的駕駛表現，例如行車穩定性、轉向準繩度、迫力制動效能等等，的確要認真測試先至知道可有改進還是葫蘆依舊。為求更準確更全面測試，今次「判官」指明要由公路飛馳到迂迴山路「試當真」；Uncle Lim 亦都明言唔會因為引擎排氣量滿足到佢嘅迷思而攤流攤，更是好一句「夠膽返嚟香港就夠膽砌盡佢」。

另外，65座 3+2 座椅佈局嘅問題，Uncle Lim 梗係又想「多多意見」，而「判官」早有同代理做定兩手準備…..

即係有彩蛋？去片就會知道吧！

全集影片，已經上載到 HK Bus Channel 的 YouTube 頻道。

睇完記得點擊 SUBSCRIBE 訂閱，與及「撳鐘仔」以便可以隨時知道有新影片上架。

特別鳴謝： 宇通客車香港總代理 大昌行集團 – 合壹汽車有限公司