九巴 WeLab Bank 重演1975年4月30日歷史?

1975年4月30日，越南共產黨人民軍總參謀長文進勇將軍率領約13萬兵力攻入越南共和國首都西貢，史稱「西貢淪陷」。

上個月，美軍從阿富汗撤走期間，塔利班攻入首都喀布爾，美軍派出直升機在美國駐阿富汗大使館上空撤走使館人員，好多人嘲笑美國重演「西貢淪陷」歷史。

後日10月3日，九巴 crossover 本地虛擬銀行 WeLab Bank 推出免費乘車日第三波，路線為逢週末及公眾假期限定，來往鑽石山站至黃石碼頭嘅第96R 路線，回顧第一波的1A號線及第2波的108號線都班班頂閘，加上香港人樂於貪小便宜嘅本質，而且鍾意週末紅日狗衝入西貢遊山玩水吃喝玩樂，「西貢淪陷」歷史恐怕好難唔重演。

正所謂「執輸行頭慘過敗家」， 九巴 x WeLab Bank 嘅免費乘車日，1A 全程收費只係 $7.6，108 全程收費亦只係 $11.4，96R 全程收 $20.3，為三條路線中收費最貴嘅一條，以香港人攞著數唔駛本嘅特質，分分鐘唔駛嗰啲疑似 WeLab Bank 職員喬裝偽九巴職員好似「地產代理打街霸」咁撈客，都一定班班頂閘直入西貢。

其實每逢週末，西貢都人山人海，旺過當年「自由行」肆虐嘅油尖旺；而因為大量人口湧入加重交通負荷，西貢公路必定嚴重擠塞，早上未夠九點往西貢方向龍尾輕則大涌口，重則北圍迴旋處，再嚴重啲就蠔涌迴旋處。仲嫌唔夠喉？龍尾「過咗鄭植之中學」_{(即係陶輝屋企)} 都試過。下午過後往九龍方向，由西貢墟慢流到北圍，好彩就15分鐘，唔好彩就半個鐘，再甚至乎如果溱喬前少少炒一鑊 (好似下圖咁)，兩個鐘都唔出奇。

講到塞車，最怕就係人有三急，甚至肚痛「攪腸沙」，搞到歷「屎」重演就無謂啦。只不過璧屋落斜之後，响正西貢公路邊嘅公廁只得三個，分別位於北圍站 (對面北圍村牌坊側)、 漁民新村站 (對面行人路向前行多兩分鐘)，同白沙灣站(對面停車場)，頂盡加多個大涌口站側嘅中石化油站 (但唔知會否跟正法例唔俾你就咁行入去)。如果一個唔好彩的士台報料「消防局燈口有意外」的話，希望你忍得到啦。

正經講，九巴無理由唔知西貢公路weekend 乜嘢環境，好揀唔揀揀96R，你唔顧西貢居民都顧吓你哋啲車長伙記吖。好話唔好聽，平常週末已經塞到PK，引咁多人流唔加車又盞俾人問候娘親，加車就塞多幾錢重。仲有嘅係，撇除疑似 WeLab Bank 職員「拉客」，92 「空雞籠」好過癮咩？講緊原本諗住「有著數唔攞就笨」等96R嘅等到唔耐煩跳上架 92 照俾七個二，就必定埋下關公災難風險。

另一方面，住西貢嘅人每逢週末假期係唔想出街，一來塞車仲嚴重過平日返學返工，二來就算出到西貢墟，食又俾你啲市區人塞爆晒，甚至連超市街市啲凍肉都被搶9晒，就算好彩買到餸、生活雜貨，一抽二掕重秤到暈，自不然唔想由大路行十幾分鐘入村，尤其是有幾條要「上山下海」嘅村，例如蠔涌上到頂嘅界咸、慶徑石、打蠔墩、南山村 (專線小巴去到公廁咋，唔係去到門口)，但想搵架的士直接返入村都無，全L部車晒你哋啲市區人去東壩、西灣亭。 揸車？西貢苑時租 $19 半個鐘都隨時 FULL，唔通又揸返屋企再走出嚟呀?!

想當年「自由行」搞到市區、上水亂七八糟，就識得怒轟「支那蝗蟲」(然後引嚟「左膠」狠批歧視排外法西斯)，今時今日就四個大字關人叉事搞到西貢真係旺過油尖旺，做人可唔可以唔好咁自私?! 無錯，十幾年前我有接受過報館訪問講自由行迫爆市區香港人有乜好去處而我就推介西貢，但無叫你哋市區人入西貢做「市區蝗蟲」吖嘛！

九巴 x WeLab Bank 公佈晒無得縮，唔該啲市區人唔好掛住「貪小便宜」狗衝。就算你無急尿瀨屎，平常 weekend 西貢墟已經無啖好食，萬宜水庫人多到以為仲响尖沙咀，再咁多人入去「輪大米」搞到一肚氣的話咪話 巴士台 呢度唔提你。