為打擊乘客逃票行為，現時喺倫敦市內行走嘅 Borismaster巴士由今個月二十五號開始，將會逐步好似普通巴士一樣，轉為只用前門上車，中門落車模式服務。但輪椅使用人士及手推BB車嘅乘客仍然可要求以中門進入車廂。
呢項措施係倫敦運輸局早前喺八號綫實行試驗後決定逐步實行。試驗進行其間佢哋將位於中門及尾門所有讀卡器關閉，並且用告示提醒乘客用前門上車。結果除咗見到逃票問題有顯著減少之外，亦睇到喺停站期間，同時間使用三扇門上落客，同前門上中間落客嘅時間比較，基本上係無太大分別。
局方發言人話，只用前門上車唔單止唔會影響候車人士上車時間，反而令輪椅使用人士更加容易上車，因為唔需要同其他乘客爭上車。而根據倫敦運輸局統計，呢款三門巴士因逃票所造成嘅損失，每年高達三千六百萬英鎊，高過普通前門上車巴士過倍。
第一批轉用此模式營運嘅路綫將會係係來往Leyton至Oxford Circus 的55號綫，以及由Fulwell 去Hammersnith的267號綫。
自2012年開始直至目前為止，已有超過一千部Borismaster巴士在倫敦市內三十幾條路綫服務市民。 佢係用嚟取代Boris Johnson之前一任倫敦市長利文斯通所引入嘅平治牌掛接巴士。當年新車價格係三十五萬五千英鎊，同期ADL Enviro 400 Euro V Hybrid定價係三十一萬二千英鎊。事實上呢款巴士好多人都唔係太喜歡。 有司機反映呢款車太長唔靈活，而且剎車時好容易踩咗油門造成意外。因為佢嘅迫力腳掌同油針掌係平排同埋同一高度，當司機收油時會感覺部車好似踩住迫力咁收慢，好多司機，特別如果精神不足就會以為踩住迫力，如果再踩多腳就會出事。普遍乘客覺得呢款車好熱好焗促, 因為大多數正行走嘅同款巴士，好多車窗都係梗窗唔開得，夏天更有人坐到幾乎中暑。 此外，部份路綫，例如行走市中心的38號綫，因為提供1至2 分鐘服務，繁忙時間可以見到四至五部同綫巴士塞住條馬路造成擠塞。
倫敦運輸局亦一早無再訂購呢款巴士。 隨住車鹷增長，相信呢款大白象式交通工具過多幾年就會完全消失。
Be the first to comment