是咁的，話說當地時間10月28號朝早8點前少少，美國賓夕法尼亞州匹茲堡市中心，有一架當地港務局旗下嘅公共巴士喺燈位等緊轉燈嘅時候遇啱地陷，搞到巴士車尾跌入窿、車頭就懸空。
事後搞咗成個日頭先至將跌咗入去呢個窿嘅巴士吊走，連埋要接駁返受損嘅地下設施，呢個路段現時估計要封閉8個星期進行搶修。
即係咁講，通常呢啲咁突然又得意嘅情景總會引發到一啲人嘅生意噱頭――正如每年農曆新年香港年宵市場總會有啲古靈精怪、以當時香港比較多人講嘅話題搞出嚟、但又唔知算唔算應節嘅商品――美國呢啲邪惡資本主義國家當然更加唔會例外。
首先同大家睇下呢一間開喺美國賓夕法尼亞州匹茲堡市郊附近嘅餅店，佢哋揀咗打印類似當日跌落個窿嗰架匹茲堡港務局巴士咁上下樣嘅紙，插喺佢哋賣嘅朱古力冬甩個窿上面。
呢間餅店將呢一個噱頭擺咗上佢哋嘅社交媒體專頁之後，有啲網民見到仲以為只係一張改圖。不過正所謂「行動最實際」，有網民真係走咗去呢間餅店睇下啲冬甩係咪真係有一架巴士，見到個情境係真㗎喎！
諗到加架「巴士」上去啲食物上面嘅餅店就梗係唔止一間啦！跟住就帶大家去睇下同樣係美國賓夕法尼亞州、位於匹茲堡西北面80公里外嘅紐卡素市，呢一間餅店就相對玩得簡單啲，揀咗打印一架藍色嘅巴士插喺佢哋賣嘅杯仔蛋糕啲忌廉上面――諗落好似上一間用冬甩會比較切合「跌落個窿」嘅概念囉！
咁當然講到生意噱頭，就唔只餅店先至諗得到嘅，有藝術家用到今次「巴士頭凌空」事件嘅話題整咗一啲唔食得嘅商品添！
就喺返匹茲堡市，有一個當地嘅藝術家就用咗今次嘅事件創造咗一款聖誕飾物――仲要掛上聖誕樹又得，座檯又得。
佢依家就喺網上接緊訂單，預計11月中可以出到貨畀客戶，售價就係30蚊美金另加運費。呢個價錢抵唔抵有少許見仁見智――但貪得意買一件喺2019年聖誕可以恥笑一番，開心係無價嘅。
如果覺得講到聖誕節有啲遙遠嘅話，不妨睇下啱啱過去咗嘅萬聖節啦！
匹茲堡市就有一個人揀咗喺2019年萬聖節走去扮呢架跌咗入去大窿嘅巴士，佢喺萬聖節當晚著到咁樣周街走，引嚟唔少途人嘅注目，用3個鐘頭去裝扮都抵啦！
好多人成日都喺度話「人生不如意事十常八九」，如果覺得無啦啦坐巴士遇著地陷跌落個窿係一件壞事，不過反返轉頭咁諗，當時巴士上只有一個乘客揩傷碰瘀少少，不如共同享受一下社會上一時之間嘅歡樂噱頭啦！
1 Trackback / Pingback