相信香港唔少人對於同香港一海之隔嘅澳門即使唔係好熟悉都唔會太陌生，不過近年過去澳門玩嘅香港人，唔知係咪好鍾意貪小便宜，唔少都係揀返搭賭場嘅「發財車」周圍去，好似少咗人會識得就咁喺澳門街搭公共巴士。
其實近年喺澳門嘅公共巴士都經歷過澳門政府嘅一啲所謂改革，其中最重要係《澳門道路集體客運公共服務》合同運作模式。 原本合同由2011年8月1號開始為期7年，但期間經歷過一啲好受爭議嘅服務質素問題，而原本營辦商亦由3間（維澳蓮運、澳巴、新福利）變成2018年8月1號之後嘅2間（澳巴、新福利）。
大家細心留意一諗，其實原本嘅合同一早已經喺2018年8月1號夠期，究竟現時澳門街公共巴士服務係點樣嘅模式批給佢哋運作呢？
原來澳門政府喺2018年8月1號原有嘅合同到期之後，係以短期批約嘅模式，自動延長有關合約15個月，直至到2019年10月31號…即係話去到今個月底合約又到期，咁之後點算呢？
作為「與別不同」嘅澳門政府當然會有能力去「自己解決問題」，但根據多間澳門本土嘅傳媒資料，澳門政府一直對於新合同內容「乜都唔講」，無視澳門社會有唔少意見認為若然新合同有違公眾利益，澳門政府就唔應該貿然「自續」簽長約，頂多只係再次用短期續約方式批給，留畀今年底上任嘅新一屆政府先處理好現時澳門公共巴士服務各種問題之後，先至再傾簽長約。
澳門運輸工務司司長羅立文（澳門有人戲稱佢叫「羅司」）10月18號接受澳門傳媒訪時就放風，指澳門政府下星期將又「自續」，同各巴士公司再短期續約14個月，服務內容不變，而澳門政府對2間巴士公司維持每年提供約10億澳門幣財政援助。
照「羅司」解釋，澳門政府決定再與同2間巴士公司短期續約，只係因為磋商新合同「未有共識」。
佢話有啲嘢需要時間解決，而當局上一次決定短期續約，係以為畀15個月時間大家係夠傾好一份新合同，「不過傾來傾去傾唔掂，對唔住，都要再延期，無辦法。」
當然，大家都預咗佢唔會透露係乜嘢內容未達成共識，而佢亦只係呼籲澳門居民等待新一屆政府上任後，由新一屆政府表達對巴士合同嘅睇法，同埋處理之後新合同。
記者追問「羅司」如果巴士公司同政府傾極都無共識，澳門政府會唔會再次搞公開競投？「羅司」作為一個「負責任」（正負個負）嘅官員，好直接咁答：「兩個月後有一個新嘅政府，唔好再問我啦！」
對於澳門各界希望將來巴士服務有新模式，「羅司」又再次表演太極心法，指依家唔方便透露。
澳門真係一個和平、友愛、又能夠容納到唔同服務質素嘅地方。
1 Trackback / Pingback