巴士車長其實係一門專業工種，除咗表面上咁揸住巴士去接載乘客由一個地方去另一個地方，當中最重要嘅係要安全咁揸架巴士。
不過喺蘇格蘭格拉斯哥發生咗一宗巴士車長罔顧乘客安全嘅事件：事發喺當地時間10月26號下晝，涉及一班格拉斯哥第一巴士嘅60A號線巴士。
當地時間大約1350時，一名40歲嘅巴士車長喺格拉斯哥嘅公爵街登上一架顯示為行駛60A號線嘅巴士「開工」――不過巴士開出之後，巴士上嘅乘客好快就發現呢名巴士車長多次「轉錯路口」，明顯就唔係跟緊60A號線巴士嘅路線行駛，部分巴士乘客就埋去駕駛位向呢位巴士車長作出質詢。
但係巴士車長畀咗一個令巴士乘客感到驚訝嘅答案：「我依家揸緊2號線巴士呀！」 (◎＿◎) 而且巴士車長要落車行到車頭，睇見個電子路線牌先至肯相信自己揸緊一架60A號線嘅巴士――巴士車長呢一種神智不清嘅表現，加上佢行嘅時候腳步不穩，巴士上嘅乘客就開始懷疑呢個巴士車長「揩大咗」。
正當大家以為已經夠驚嚇嘅時候，呢名巴士車長再做一啲更上一層樓嘅驚嚇情節：當地時間大約1420時，巴士去到當地嘅亞皆老街，巴士車長將巴士扭埋路邊，幾乎剷上行人路，然後唔拉手掣就已經跳出車廂出面…
面對仲溜前緊嘅巴士，其中一名乘客立即喺電光火石之間走上去駕駛位拉返實個手掣，以免撞到路邊其他車輛―― 好彩結果無撞到任何人或者物件，不過巴士上面一啲年紀比較大嘅乘客都已經嚇到腳都震。
當巴士停定之後，呢名巴士車長突然間又走返上巴士，喺佢嘅手提袋入面拎走咗一樽水之後，又再跳返落車逃走。
呢個時候其中一名巴士乘客立即尾隨巴士車長，並且要求喺附近巡邏嘅警員加入追捕。
咁當然啦，一個疑似「揩大咗」嘅巴士車長又點會跑得贏一班正常狀態下嘅警員，走咗唔係好遠就已經被捕 (^v^)
無幾耐之後，第一巴士嘅員工同埋另外三、四架警車十幾名警員亦都到場，陸續為巴士上嘅乘客同埋街上嘅目擊者錄取口供。等到警員為所有人錄取口供完畢之後，涉事嘅巴士大約喺事發後一個半鐘頭先至能夠揸走。
當地警方發言人回應傳媒查詢時表示，涉案呢名巴士車長已經因為違反道路交通法被捕，佢哋會盡快提交報告畀當地檢察官採取進一步法律行動。
至於格拉斯哥第一巴士公司嘅發言人就表示，安全永遠係首要考慮，公司亦會全力協助執法當局處理今次事件。
最後要提醒所有人：無論飲咗酒定食過藥，都唔好揸車呀！
Be the first to comment