自駕巴士鬥耍家 南韓又話測試吓

大韓民國國土交通部喺10月28號公佈，10月29號開始會安排「第3級」自動駕駛巴士喺南韓世宗特別自治市做路面測試。

呢個計劃耗資370億南韓圜，巴士上嘅設備由多方研發，參與機構包括國營韓國交通學院、SK電訊、首爾國立大學、現代汽車。

今次自動駕駛巴士測試會有3個主力項目：

1. 巴士自己埋站
2. 協調巴士自動及經車長手動駛經迴旋處
3. 利用智能電話應用程式接收交通資訊以至安排乘客上落

第一架「第3級」自動駕駛巴士測試效果理想嘅話，當地政府打算2019年內開始安排兩架「第3級」自動駕駛巴士每星期2~3次行一條9.8公里長嘅路線，目標係去到2021年可以有足夠技術安排8架「第4級」自動駕駛巴士去營運一條35.6公里長嘅路線。

根據總部設喺美國國際汽車工程師學會資料，現時自動駕駛車輛技術水平以0至5共分6個級別：

「第3級」指有條件下自動駕駛，雖然車輛大多數時間可以自動駕駛，但必須有真人司機隨時準備控制車輛，自動駕駛輔助控制期間，跟車司機雖然可以暫時免於操作，但當汽車偵測到需要司機處理時，會立即畀司機接管控制，司機必須接手因應系統無力處理嘅狀況；

「第4級」指高自動駕駛，條件允許下真人司機可以畀車輛完整安排，啟動自動駕駛後，一般不必介入控制。除咗嚴苛氣候、道路標記模糊、意外，或者自動駕駛路段已經結束等情況外，車輛可以按照設定好嘅道路通則，自己轉彎、換線、加速等。自動駕駛系統並且有能力畀司機有「足夠寬裕之轉換時間」，至於司機雖然唔使插手操作車輛，但仍然應該監察車輛運作。

照咁睇，「巴士佬」暫時都唔驚會完全失業嘅。