馬路人牆影巴士 點會係正常嘅事？

即係咁講，「巴士迷」（姑且先用返個正式詞彙）喺香港都唔算稀有物種，亦有話「迷巴士啫，犯法呀？」，又好似好正常。

只不過當揸揸吓巴士見到前路有一幅「人牆」，然後上網又見到有「巴士迷」咁樣「挑機」，畀你係一個普通只係想安全接載乘客嘅巴士車長，你會有乜感受？

又…其實為咗2架巴士而去冒險衝出馬路中間影相，就算撇除嗰一刻係咪危險，其實都更進一步破壞咗「巴士迷」喺公眾嘅形象喇啩？

有讀者傳送訊息畀本台，講起噚晚喺港島嗰邊總站，一班巴士迷可以企喺行人路影相，兩三人一組有傾有講，互相有禮貌咁提醒大家遷就，成件事真係相映成趣。

係囉，何必進一步破壞「巴士迷」可能僅有嘅「正常人」形象？