「輕鐵發現號」2025年聖誕假期後暫停週末及公眾假期常規服務

港鐵公司為支持香港本地旅遊業發展，2025年2月開始推出「屯門發現號」特別旅遊專綫，當時以屯門區為主題，其後喺2025年9月再新增以元朗區為主題嘅特別旅遊專綫，同時將兩條特別旅遊專綫分別命名為「輕鐵發現號——屯門專綫」以及「輕鐵發現號——元朗專綫」。

港鐵表示去到2025年12月嘅時候，已經有超過一萬位本港市民以及訪港遊客乘搭呢兩條「輕鐵發現號」特別旅遊專線探索屯門、元朗嘅社區。

時間去到2025年12月19號，港鐵經旗下嘅手提電話流動應用程式「MTR Mobile」宣佈因應市場需求以及調整業務策略，「輕鐵發現號——屯門專綫」以及「輕鐵發現號——元朗專綫」會喺2025年12月26號之後暫停現有嘅星期六、星期日以及公眾假期嘅常規服務。

至於現有「輕鐵發現號」主題輕鐵列車喺車身上面嘅插畫設計會大致保留，向公眾展示屯門、元朗、天水圍嘅社區特色。

港鐵表示未來輕鐵仍然會積極專注探索唔同合作夥伴搞創新業務，包括團體包車服務，並且衷心感謝一眾乘客過去對「輕鐵發現號」嘅支持。