【公益活動】退役巴士再現尖沙咀 推廣SEN藝術教育

賽馬會「藝術有SENse」計劃（英文：Jockey Club Arts Make SENse Programme；下簡稱「藝術有SENse」）係由香港小童群益會主辦、香港賽馬會慈善信託基金捐助，以視覺藝術作為媒介啟發有特殊教育需要（SEN）學童嘅服務計劃。「藝術有SENse」旨在運用視覺藝術元素同埋感官關聯（sensory association），通過藝術創作歷程，為有SEN狀態嘅學童提供情緒出口，提升佢哋嘅社交溝通技巧，畀佢哋體驗由創作而嚟嘅滿足感。

「藝術有SENse」喺2021年5月期間舉行「Common SENse：藝術介入SEN的巴士展覽」（簡稱「Common SENse」），去到早已退役嘅前中巴利蘭珍寶SF15裡面，展出特邀藝術家因應關注SEN發展嘅藝術創作，並且加設現場藝術工作坊（例如：迷宮設計、電線網淺浮雕、學習Matisse繪畫等）畀參觀者即時體驗。

【公益活動】退役巴士遊港九 SEN教育傳授

隨著開幕活動喺2021年5月8號假香港青年協會領袖學院舉行，之後「Common SENse」已經搞咗幾次活動，包括港九巡遊以至入馬草壟露營…

【公益活動】伙退役巴士露營 促進SEN認識

始終SEN喺現今社會已經唔係一個小眾課題，公眾多啲了解就自然可以消弭錯誤嘅刻板印象，「Common SENse」喺2021年5月18~19號兩個下晝特別再次去到尖沙咀推廣用藝術協助SEN學童。

「Common SENse」呢架珍寶巴士路經尖沙咀碼頭嘅時候，吸引到巴士車長同乘客嘅目光，除咗拎出手提電話「打卡」之外，亦有查詢「究竟發生乜嘢事？」

當然咁大架「巴士」塞入巴士總站擺幾句鐘就唔得啦！「Common SENse」今次就揀咗尖沙咀梳士巴利道香港瑰麗酒店側邊嘅旅遊巴士灣。

巴士一到達就已經有市民紛紛合照同埋登記輪候參觀，希望喺重拾往日「熱狗」回憶嘅同時，可以多啲了解SEN學童嘅心境。

如果錯過咗尖沙咀呢一站，「藝術巴士」嚟緊嗰個週末會去到下一個地方畀公眾參觀：

石屋家園
地址：九龍城聯合道 133 號
日期：2021年5月22~23號
時間：1200~2000

有興趣參觀就記低喇！