九巴公佈援助大埔宏福苑火災居民方案

之前講到因應2025年11月26號大埔宏福苑5級火警，九龍巴士（一九三三）有限公司（「九巴」）及龍運巴士有限公司（「龍運」）喺2025年11月27號發稿表示會捐款協助受影響嘅居民。

九巴及龍運當時宣布透過「KMB Charity Foundation」捐出港幣200萬元為死傷者家屬提供經濟援助，以及協助他們渡過難關。其後九巴喺2025年11月28號傍晚正式公佈援助方案，表示九巴將透過呢筆捐助，向每戶派發港幣1000元應急錢。

九巴會派完去到大埔設置登記處，受影響嘅住戶可以憑證明文件即場登記，詳情如下︰

• 日期︰2025年11月30號到2025年12月2號
• 時間︰09~15時
• 地點︰大埔公路元州仔段往九龍方向嘅廣福邨巴士站（加氣站對面）
• 證明文件︰
  • 身份證明文件
  • 實體或電子住址證明
  • 社會福利署緊急救濟登記證（即「災民證」，如有）

如果受影響嘅住戶未能喺上述時間內親身到場登記，亦可以喺08~21時致電九巴顧客服務熱線（2745 4466）向熱線員登記，九巴稍後會逐一聯絡登記人安排領取應急錢。

九巴及龍運重申會同每一位受火災影響嘅市民同在，希望通過呢次捐款，為受災市民送上支持同埋關懷，並且會繼續秉持「城市脈搏」理念，心繫大埔。