曾咀「拜山」路遙遠春秋二祭外點去？

位於新界屯門區西部嘅曾咀，曾經有一條沿沙灘同岩岸邊嘅村落。1993年，相鄰嘅湧浪、曾咀、稔灣分別興建龍鼓灘發電廠、曾咀煤灰湖、新界西堆填區，曾咀村民因而遷出。

多年後，中華電力將曾咀煤灰湖分期交還畀香港政府，原本嘅曾咀煤灰湖已開始有所發展，現時嘅建設主要係以下兩項：

東湖：T·PARK 源·區
中湖西側：屯門曾咀靈灰安置所

屯門曾咀靈灰安置所總佔地大約3公頃，主要建築物係一座樓高8層、提供16萬個骨灰龕位嘅靈灰閣大樓，其中5~7樓劃為唔畀燒香嘅骨灰龕位，頂層就闢建空中花園，而喺地面亦設有紀念花園。

由2014年11月4號食物及衛生局提交相關建議畀屯門區議會討論，到2020年5月15號屯門曾咀靈灰安置所東翼啟用，前後歷時5年半，「居民」已經開始陸續「入伙」。

**（2021年1月中時嘅屯門曾咀靈灰安置所，可見唔少「單位」仲未「入伙」，花槽植物仍然未生長，至於景觀則係后海灣）**

一如香港唔少墳場，現時除清明、重陽前後各4個星期嘅星期六、日及公眾假期外，喺平日並無專營公共巴士直達屯門曾咀靈灰安置所，最近嘅集體公共交通工具只有接駁港鐵屯門站（經輕鐵蝴蝶站、屯門碼頭、屯門市中心）←→龍鼓灘嘅港鐵巴士K52號路線。（編按：因新界西北堆填區設喺大水坑河一帶，香港政府早喺1991年按《道路工程使用及補償條例》刊憲，永久封閉稔灣路其中一段，並喺新界西北堆填區入口加設大閘，因此由白泥一邊前往就更唔可行。）

根據管理屯門曾咀靈灰安置所嘅食物環境衛生署建議，市民平日可以喺屯門港鐡站乘搭的士前往屯門曾咀靈灰安置所；不過，為方便市民，食物環境衛生署委託大利巴士集團旗下Fancy Aurora Tour Bus Limited提供旅遊巴士，喺平日提供有限度免費穿梭巴士接載市民往返屯門「V city」地下嘅屯門站公共運輸交匯處以及屯門曾咀靈灰安置所。

根據服務詳情表，呢條免費穿梭巴士路線係用1架載客量唔超過65座位嘅單層公共巴士行走，現時常見嘅車型係大利巴士集團旗下廈門豐泰國際新能源汽車（FTBCI）生產嘅FBC6120CRZ1型旅遊巴士。

由於呢條免費穿梭巴士路線喺屯門站公共運輸交匯處係使用非專營巴士上落客區嘅有限空間上落乘客，難免阻礙其他非專營巴士，所以遇上穿梭巴士早到而乘客未到就有時需要「兜圈」畀其他非專營巴士出入，呢種運作方式曾經惹嚟唔知情嘅市民投訴「撇甩咗啲客」。

根據服務詳情表，每一個屯門站→曾咀接駁之後曾咀→屯門站嘅單向開車間隔係35分鐘，而一般行車時間就大約25分鐘，即係司機每做完「一個單」就可以休息大約10分鐘。

至於喺屯門曾咀靈灰安置所，落車位置同上車位置前後相差幾十米，分開兩批人潮。不過，喺屯門曾咀靈灰安置所有部份金屬指示牌嘅箭咀方向做錯咗，需要貼上膠貼更正。

因為呢條免費穿梭巴士路線運載能力有限，食物環境衛生署為此有以下限制措施：

免費穿梭巴士只給予使用曾咀靈灰安置所及紀念花園相關服務嘅人士或其親友乘搭。
乘客必須喺使用穿梭巴士服務前最少3日透過熱線電話或Whatsapp電話預約。乘客可以喺星期一至星期六（公眾假期除外）09~13時或14~18時嘅辦公時間內進行預約。（關於預約穿梭巴士以外嘅查詢，電話號碼係2713 1077）
預約時，需要提供乘坐穿梭巴士日期、來回班次時間、乘坐人數、先人姓名。因巴士班次及座位有限，原定每位申請人最多可攜同7名親友乘搭穿梭巴士嘅安排，由2021年3月1日起改為每位申請人最多可攜同5名親友乘搭穿梭巴士，先到先得。
乘客只可預約由申請翌日起計第3~17日內嘅穿梭巴士服務。
乘坐穿梭巴士當日，已預約嘅乘客需要向司機提供其本人及先人資料以作核實。
未有預約人士，一般不得使用穿梭巴士服務（然而若果到預定開車時間仍然有空位，司機可酌情為市民作即場登記）。
清明節、重陽節已經由九巴提供特別巴士服務期間，呢條免費穿梭巴士線將會暫停服務。
食物環境衛生署有權拒絕任何人士乘搭穿梭巴士而無須給予理由，亦有權修改有關乘搭規則。

有一啲補充資料，根據駐守屯門曾咀靈灰安置所嘅保安人員透露：

平日經常有揸車入去嘅市民因為唔熟路，去到屯門曾咀靈灰安置所嗰陣好順著去咁由閘口直駛，其實會係變咗逆綫行車，同穿梭巴士迎頭咁行，希望揸車嘅市民留意入咗閘口之後，係要轉去左邊，順時針咁兜，而喺場內過馬路嘅市民亦要小心「盲毛」司機。
相關旅遊巴士除咗接載市民，亦係屯門曾咀靈灰安置所工作人員返工放工嘅交通工具之一，所以每日司機工作時數可以長達13句鐘，希望市民都可以對司機寬容一啲。

2021年5月補充資料：

隨著原有合約喺2021年4月30號到期，當局曾經一度「招標」，有幾間旅遊巴士公司都有回覆「入標」，然而當局之後又突然話「取消招標」，卻又喺2021年4月27號委託捷迅旅運有限公司接手。

不過除咗車輛分配上紙上寫加到15架載客量唔超過65座位嘅單層公共巴士之外（實際都只係出1架），當局仲加上咗條款指有效期只係到2021年9月12號，明顯就已經為「收綫」埋咗伏筆。

2021年9月補充資料：

因應當局要求九巴營運嘅56S號巴士路線只會喺清明節、重陽節呢啲傳統「春秋二祭」期間的嘅週末假日提供服務，屯門區議會向運輸署反映其實全年其他日子都一直有唔少掃墓人士前往曾咀，除咗自己揸車到場嘅市民會令大量車輛駛經附近路段導致交通擠塞之外，呢一條穿梭巴士路線根本無法處理人潮，所以要求提供常規巴士服務，並且建議將港鐵K52號巴士路線延長到曾咀。港鐵代表表示會同運輸署研究提供巴士服務至曾咀。

2021年9月初，運輸署諮詢屯門區議會就開辦新巴士路線嘅意見，會上獲得屯門區議會支持。2021年9月10號，港鐵發出新聞稿，表示將開辦K52A號巴士路線（港鐵屯門站←→曾咀靈灰安置所），配合曾咀靈灰安置所開放時間，每日朝8晚6為乘客提供定時雙向接駁巴士服務。