【防疫要緊】病毒飄浮半句鐘 口罩、換風勿放鬆

話說之前喺臺灣，有新型冠狀病毒（武漢肺炎）確診患者曾經多次搭公共巴士，搞到有幾個巴士車長要「居家隔離」。面對病毒強大傳播力，臺灣當局一直建議公眾搭公共交通工具時戴上口罩。

【臺灣巴士】確診患者搭6次 巴士車長要留家

海峽對岸嘅中国就爆發一單搭公共巴士令13人集體感染嘅案例，中国嘅中華預防醫學會等機構進行研究後發現，喺密閉嘅冷氣巴士車廂入面，病毒傳播距離最遠可以去到4米半，並且至少可以漂浮喺空氣中半句鐘，導致巴士內乘客感染。

題目為《一起在公共交通工具內氣溶膠傳播的新型冠狀病毒肺炎聚集性疫情流行病學調查》嘅研究，由中華預防醫學會主辦嘅《實用預防醫學》對外公開發表。研究對中国湖南省一宗乘搭公共交通工具引發嘅「聚集性疫情」進行研究。

其中，病例A喺2020年1月22號中午，乘搭49座全封閉冷氣客運巴士，病例A同車上最近嘅一個被感染者（病例E）之間距離唔夠半米，但同最遠嘅一個被感染者（病例G）之間距離去到4米半，透過調查後判斷病毒喺密閉環境有可能以氣霧（氣溶膠）方式傳播。

調查認為，病毒傳播距離喺封閉式冷氣空間影響下，有可能超越目前認為飛沫有效傳播距離（以往研究指通常只係1米之內）。

同一時間，調查發現病毒喺冷氣巴士車廂入面，能夠令人感染嘅有效存活時間可能唔少過30分鐘。研究指出，嗰架巴士曾經喺B站停留30分鐘後返回原本嘅A站，而病例A去到B站落巴士之後，一個上巴士去A站嘅病例J，經調查亦證實係喺呢個期間感染。

【防疫要緊】搭巴士都要防疫 口罩唔該戴好先

因此研究建議公眾搭公共交通工具嘅時候，必須做好個人防護，尤其要戴好口罩，同時營辦商要保證公共交通工具內嘅換氣次數、鮮風量，以及做好車廂內清潔消毒。